föstudagur, ágúst 29, 2003

Mér finnst eins og öllum finnist ógeðslega fyndið að ég sé að fara í tómstundafræði. Kannski af því að enginn veit hvað það er... Eða líka finnst mér eins og fólk haldi að þetta sé eitthvað svona hálf-háskólanám sem er bara eitthvert gant. Ég er samt ansi spennt að byrja og sjá hvernig þetta er uppbyggt, ég veit allavega að kennslubækurnar eru mjög spennandi. Þær kostuðu alveg 20 þúsund krónur svo það er eins gott að þær verði opnaðar amk tvisvar fram að upplestrarfríi ;-)
Hitti Hörð rétthyrning í Bóksölunni og áttum við súrar samræður við bílastæðið. Ég held að honum finnist ég ekki eins fyndin og mér finnst hann... En það geta ekki allir verið vinir :-)
Sótti myndir úr framköllun og komst að því, mér til mikillar skelfingar, að ég er með gömlukallamaga. Sú uppgötvun orsakaði alveg 20 mín þunglyndi þar til ég mundi að þunglyndi getur valdið átkasti -tröstespisning- sem gæti aukið á gömlukallamagann svo ég hætti því bara. Sótti líka pilsið úr hreinsun og það er bara alveg jafn hvítt og áður og myndirnar enn á sínum stað! Mun Jói því ekki lengur vera þekktur sem Asna-Jói (í bili allavega...).
Ég er að fara í söngtíma nr.2 til Gunnars, nýja söngkennarans míns, á eftir. Fyndið að fara svona í fyrsta söngtímann til einhvers, það er eiginlega eins og læknisskoðun; 'Nú ætla ég að prófa þetta' 'Nú skulum við sjá efra raddsviðið' 'Mig langar að athuga neðra sviðið þitt' og svo framvegis. Og maður er geðveikt að vanda sig til þess að kennaranum finnist maður góður nemandi og vilji kenna manni áfram... Svo líður tíminn og eftir 2 mánuði kemur í ljós að maður er glataður nemandi en þá getur kennarinn ekkert gert. Múhahaha!

þriðjudagur, ágúst 26, 2003

Hádegismatur með Sævari í dag, það verður nú gaman. Svo stelpuhittingur í kvöld, það verður örugglega enn skemmtilegra... þær kunna alltaf aðeins meira slúður en Sævar blessaður. Og ef tími gefst til ætlar Asna-Jói (eins og hann er alltaf kallaður þegar ónýta pilsið ber á góma) að gefa mér nýtt pils. Það er nú sætt af honum. En væri enn sætara ef ég væri ekki að pína hann til þess hahaha. Nú er ég að reyna að skilja þetta friendster drasl sem Hörður sendi mér, er ekki alveg að ná pointinu með þessu en allt í lagi, það hlýtur að koma.
Annars er bara voða ljúft að vera svona í fríi, ég kláraði Potterinn í gær og tek því rólega núna, yndislegt líf. Eina vandamálið sem á við að stríða í augnablikinu er hvað það er erfitt að vélrita með gervineglur ;-)

mánudagur, ágúst 25, 2003

Ó ég gleymdi að segja að burtséð frá einhverjum formsatriðum er ég frá og með deginum í dag skráð í tómstundafræði við HÍ. Ferfalt húrra fyrir því: Húrra! Húrra! Húrra! Húrrrraaaaaa!
Þeytingsdagur.is. Fyrst á skrifstofu félagsvísindadeildar og svo á nemendaskrá og svo aftur á skrifstofu félagsvísindadeildar og nú þarf ég að senda ímeil hægri vinstri á báða staðina. Svo í Skipholt að ná í skattkortið og svo í Árbæ að skila því... Svo í söngtíma í Grafarvogi og svo í Baðhúsið og svo með filmur í framköllun á Háaleitisbraut og svo með pilsið mitt í hreinsun. Maðurinn sagði að það yrði aldrei samt aftur, myndirnar myndu 'renna' af því og rauðvínið myndi örugglega ekki fara. Það fannst mér mjög leiðinlegt að heyra því þetta er uppáhaldspilsið mitt. Asna-Jói að hella rauðvíni yfir mig. Og ég sem var í hvítu pilsi! Fyrir utan þetta var brúðkaupsdagurinn sannarlega skemmtilegur, gott veður, falleg athöfn og skemmtileg veisla. ég var reyndar í smá stressi þar sem ég þurfti að mæta á söng æfingu í kirkjunni kl.11 og athöfnin var kl.15. Brúðkaupið var nefnilega í Skálholti... En það reddaðist allt þegar Jóapabbi mixaði handa mér herbergi á Hótel Örk í 1 klst þar sem ég gat skipt um föt og gert mig frambærilega. Eða svona um það bil.

mánudagur, ágúst 18, 2003

Þetta var verulega góð helgi takk fyrir! Óvissuferðin fín og ég fékk verðlaun fyrir að vera í 4.-5.sæti í keilukeppni þrátt fyrir að við höfum næstum kveikt í kúluskiladimsinum... Bara gaman. En laugardagurinn var samt þúsund sinnum skemmtilegri, alveg frábær dagur! Ég er enn með smá harðsperrur eftir reiðtúrinn en það eru einu eftirköstin, fyrir utan fullt af skemmtilegum minningum. Enduðum daginn á Mojito, snobbbarnum fyrir ofan Apótekið. Frekar glataður staður verð ég að segja en músíkin alveg til sóma. Svo voru allir orðnir þreyttir eftir laaangan dag og gæsin þráði að hitta stegginn svo við ákváðum að fara að leita að fyllisvínunum sem voru að fagna með honum. Eftir mikið röfl og næstum því slagsmál komst ég loksins heim. Það var bara gott. Þurfti svo ekki að vera liðsmaður í gær, liðsþiggjandanum til mikillar heppni því ég var alveg ógeð.is. Við Jói fórum á KFC og í sund til að reyna að fríska okkur en við vorum samt aumingjar og fórum snemma í sitt hvort bólið. Svo er ég alveg viss um að blessuð börnin hafi frétta af óvissuferðinni okkar á föstudaginn því það var einhvernveginn allt í hers höndum í dag, allir eitthvað mis. Dagurinn var svo lengi að líða að ég hélt á tímabili að það væri kominn þriðjudagur. Whishful thinking því miður.

föstudagur, ágúst 15, 2003

Nú er ég á leið í óvissuferð með vinnunni. Fyllerí. Á morgun er gæsapartý frá klukkan 8:45 til ég veit ekki hvað. Ógeðslega mikið fyllerí. Á sunnudaginn er ég svo að liðsmannast í 6 tíma eða eitthvað. Ógeðslegt. Aumingja barnið. EF ég á að segja alveg eins og er langar mig mest bara að leggjast undir sæng og lesa Harry Potter alla helgina. En kannski er líka ágætt að drekkja sorgum sínum, ég reyni það allavega.
Ég hef góðar og vondar fréttir. Góðu fréttirnar eru þær að enginn þarf að sakna mín í vetur. Vondu fréttirnar eru þær að ég komst ekki inn í skólann í Hamborg.

þriðjudagur, ágúst 12, 2003

Það er alveg glatað að vera svona lasin. Lá heima í allan dag og lét mér leiðast á milli svefnlúra. Rættist þó úr seinni partinn því þá fékk ég nýju Harry Potter bókina - takk Jói * - og Siríus súkkulaði - takk Ellen - Þrátt fyrir það er alveg á stefnuskránni að vera sprækur sem lækur á morgun. Og nei, það er ekki enn komið bréf.

mánudagur, ágúst 11, 2003

Og nú er ég lasin. Með kvef og hálsbólgu og magaveiki. Geri aðrir betur! Skemmtilegt svona um mitt sumarið og einmitt í vikunni þar sem ég á að byrja í söngtímum á skrilljón. En það kemur mér svo sem ekkert á óvart. Það er nú regla frekar en undantekning að ég fái kvef eða einhvern fjanda í hálsinn þegar eitthvað sönglegt stendur til. Eins og Stebbi Hilmars, hann er líka svona. Ég kenni köldum tásum eftir hýrrastoltsgönguna í rigningunni um, það var vel blautt. En líka gaman, fullt af fallegu og skrautlegu og skemmtilegu fólki. Þegar allir komu saman á sviðinu í lok skemmtiatriðanna og sungu 'Ég er eins og ég er' var ég næstum því bara orðin lessa. Bara til að geta verið með og skemmt mér svona konunglega!

föstudagur, ágúst 08, 2003

Svo er það Gay Pride á morgun! Alveg skyldumæting, það verður örugglega gleði og glaumur. Mig langar voða mikið á Millaballið annað kvöld en ég var víst búin að semja við sjálfa mig um að hafa mig hæga þessa helgi því næsta helgi verður klikk og eins gott að vera hressogkátur.is. Nú ætla ég að fara að stunda símavændi og finna mér eitthvað skemmtilegt að gera í kvöld. Góða helgi menn og mýs!
Annars bara ekkert nýtt. Ekkert bréf og engar ákvarðanir teknar, allavega engar stórar. Undarlegt í gangi í vinnunni, finnst eins og fólk sé að forðast að vinna með mér. Kannski er ég bara paranoid, veit ekki alveg... Skiptir samt engu máli því eftir 3 vikur er ég hætt og byrjuð í XXXXXXX að XXXXXX þangað til XXXXXX þegar ég klára það og verð XXXXXXXXX. (Sá sem getur fyllt í eyðurnar má gjarnan hafa samband).
Talandi um naflakusk þá finnst mér slík fyrirbæri heldur betur vera að færa sig upp á skaftið! Kuskið hennar Ólafar heldur uppi bloggsíðu og mitt skrifar í gestabókina mína! Ég er hrædd um að það sé bara tímaspursmál hvenær kuskið tekur yfir heiminn. Be afraid, be very afraid.
Hei! Nú hef ég ekkert skrifað heillengi. Ég skammast mín mjög. Málið er bara það að þegar ég ætla að skrifa og kíki á netið þá festist ég í að lesa kílómeterslangar ferðasögur og þegar ég er loksins búin að því þá er ég komin með ógeð á tölvunni og fer að gera eitthvað annað... Ágætt samt að einhver skrifi sína sögu í smáatriðum því um Verslunarmannahelgina vil ég bara segja þetta:
Fór á Snæfellsnes. Tjaldaði í Arnarstapa og var þar í tvær nætur. Drakk gott rauðvín. Skoðaði nesið og fannst það fallegt. Komst að því að sumir virða ekki eðlileg mörk á milli tjalda. Lærði að það er ekki snjallt að opna bjórflöskur með bíllyklum því þeir geta brotnað. Hitti fullt af kríum sem vildu gogga í hausinn minn. Fór í sund þar sem potturinn var mjög heitur, sundlaugin meðal og sturturnar ískaldar. Komst að því að nokkrir læra hratt, sumir hægt og aðrir aldrei. Fékk illt í magann. Þegar ég kom heim kveiktum við systur næstum því í svölunum okkar. The end.