Kippti thessu af
mbl.is:
Heilabygging fólks með einhverfu er ?ýkt mynd? eðlilegrar heilabyggingar í körlum, samkvæmt niðurstöðum nýrrar rannsóknar sem gerð var í Bretlandi. Segja höfundar rannsóknarinnar að það sé ekki einungis atferli einhverfra sem líkist öfgakenndri útgáfu af karllægu atferli heldur sé vöxtur heilans í einhverfum ennfremur líkur öfgakenndri útgáfu af vexti eðlilegs karlheila.
Frá þessu greinir breska ríkisútvarpið, BBC.
Rannsóknin var gerð við Rannsóknarmiðstöð í einhverfu við Cambridge-háskóla og birtast niðurstöðurnar í nýjasta hefti Science. Segja vísindamennirnir að frekari rannsóknir á þessari tilgátu sinni gæti aukið þekkingu á einhverfu.
Þeir benda á að tiltekin svæði í heila karlmanna þroskist yfirleitt fyrr en í heila kvenna og að minni tengsl séu á milli heilahvela í körlum en konum. Heilinn í drengjum vex hraðar en heilinn í stúlkum. Þessi vöxtur virðist enn hraðari hjá fólki með einhverfu.
Þá má einnig sjá mismun á tilteknum svæðum í heilanum. Heilamandlan, sem gegnir lykilhlutverki í tilfinningaviðbrögðum, er óeðlilega stór í einhverfum börnum, og líkist það öfgakenndri þróun karlheila. Segja vísindamennirnir að vísbendingar megi finna um að karlhormón á borð við testósterón fyrir fæðingu hafi áhrif á þessa þróun.
Simon Baron-Cohen, sem stjórnaði rannsókninni, leggur áherslu á að markmiðið með henni sé fyrst og fremst að öðlast aukinn skilning á einhverfu. Markmiðið sé ekki að leita leiða til að koma í veg fyrir hana. ?Siðferðislegu spurningarnar eru tvær: Er einhverfa sjúkdómur, og ætti að reyna að koma í veg fyrir hann? Margir líta alls ekki svo á að einhverf börn séu sjúk, heldur þroskist einfaldlega öðru vísi en önnur börn.?