föstudagur, apríl 29, 2005

Ég held svei mér þá að það sé bara komið sumar! Ég er allavega komin á hvíta strigaskó og pils í tilefni hækkandi sólar og komandi helgi. Ekki það að ég verði liðtæk í tjúttinu um helgina, próflestur og vinna á döfinni... En það má nú dressa sig upp fyrir því ;) Og, OG! Fór út að hlaupa í gærmorgun kl.6! Ok, kannski ekki hlaupa... en ég skokkaði! Mér finnst það einhvernveginn miku merkilegra en að fara í ræktina enda er þetta slatta erfiðara. Ánægð með mig núna sko!

Er búin að vera hrikalega leiðinlegur yfirmaður í vikunni, á námskeiðum eða fundum allan daginn en mæti svo í lok dags til að taka fólk fyrir. Believe it or not þá á ég mjög erfitt með að skamma fólkið mitt. Kvíði fyrir lengi á undan og er með hnút í maganum. En það tilheyrir víst, svona til að halda starfinu góðu. Var reyndar á fantafínu námskeiði í aðferðum til að efla félagshæfni einhverfra og þar lærði ég meðal annars að greina líðan á nokkuð nákvæman hátt. Ef einhver hefur áhuga á því myndi ég segja að akkúrat núna væri ég svona 7,5 glöð, 6 áhyggjufull, 9,5 montin og bara nokkuð græn í hegðun.

föstudagur, apríl 22, 2005

Gleðilegt sumar!

Ég fagnaði sumarkomunni með enn einni vel heppnaðri sýningu af Cosí. Hausinn á mér er að verða svo stór af öllu hrósinu að ég kemst varla í húfuna mína lengur. En það er allt í lagi, ég þarf enga húfu því það er komið sumar! Viðburðaríkur vetur að baki og vonandi viðburðaríkt sumar framundan. Tíminn er sko alveg búinn að fljúga áfram undanfarna mánuði en nú held ég að það sé kominn tími til að staldra aðeins við og hlusta á fuglasönginn. Helgin mín mun allavega fara í það. Ef þið sjáið húfulaust kvenbarn með sperrt eyru á gangi um græn svæði borgarinnar er ykkur velkomið að rölta með.

miðvikudagur, apríl 20, 2005

Hversu glatað er það að sitja inni þegar sól skín í heiði og allir í ísbíltúr og vinna yfirvinnu? Reyndar er það engum að kenna nema mér því ég er búin að vera algjör slúbbert í vinnunni upp á síðkastið. Það hefur ekkert komist að nema bara ópera ópera ópera. En nú er bara ein sýning eftir svo ég get farið að einbeita mér að skemmtilegri hlutum, eins og ráðningarsamningum og yfirvinnuútreikningum. Ha!
Frumsýningin gekk rosalega vel og önnur sýningin líka, þannig að álögunum hefur verið létt. Við fengum svakalega mikið hrós og allir eru í skýjunum með okkur. Mamma kom meira að segja á báðar sýningarnar, þannig að við erum varla svo hrikalega leiðinleg... Vonandi gengur þriðja og síðasta sýningin eins vel svo við getum fagnað af fullum krafti annað kvöld ;) Ég er búin að eiga marga góða gesti í sal Ýmis hingað til og held að það verði ekkert öðruvísi á morgun. Mikið er gott að eiga svona frábæra stuðningsaðila! Ég tala nú ekki um þegar fólk er tilbúið að krulla á manni hárið og strauja fyrir mann dívukjólinn þegar mikið liggur á, keyra alla leið frá Selfossi... nú eða koma fljúgandi austan úr óbyggðum :) Yndislegt fólk.

laugardagur, apríl 16, 2005

Kvöldið fyrir frumsýningu... Alltaf skemmtilegt :)
Sökum ófærðar (hvað er eiginlega málið með mig og ófærð??!) er ég ekki að fá knúsin sem ég ætlaði að njóta í kvöld en ég þegi þá allavega og hlífi röddinni. Smá Pollýönnu-fílíngur i gangi hérna... Er reyndar furðu lítið stressuð. Auðvitað hef ég áhyggjur af því að ég klúðri aríunni eða að einhver samsöngur fari í rugl en svona 70% af mér hlakka bara til. Hlakka til að klára þetta, uppskera afrakstur endalausrar vinnu og auðvitað að fá klappið. Það er bara þannig að klappið í lok svona sýningar er það besta í heimi. Og adrenalínvíman er ekkert leiðinleg... Að því gefnu að maður sé sáttur við frammistöðuna auðvitað, en ég ætla bara að gefa mér það núna að mér muni ganga vel á morgun! Skítt með hjátrú og kellingabækur ;)

föstudagur, apríl 15, 2005

Loksins er að koma að því! Frumsýning á sunnudag og má ekki seinna vera miðað við ástand þátttakenda. Þvílíkt drama búið að vera í gangi 'behind the scenes' og allir á tánum en nú lítur út fyrir að frumsýnt verði í ró og spekt, amk á yfirborðinu.
En í stuttu máli sagt:
Cosi fan tutte, Skóli elskendanna, í Ými sunnudag, mánudag og fimmtudag kl.20. Be there.
Í tilefni af Ungfrú Reykjavík keppninni sem haldin verður í kvöld er alltaf verið að sýna keppendur í sjónvarpinu. Í auglýsingunni segja þær nafn sitt, aldur og áhugamál. Það sem vekur athygli mína er að þær eru allar með mjög grand áhugamál, eins og stangveiði, mótorhjól, flug, hestamennsku... Þar er komin enn ein ástæðan fyrir því að ég verð aldrei Ungfrú Reykjavík ;)

laugardagur, apríl 09, 2005

Áskorunin fór fram í gær og þungu fargi er af mér létt. Þannig er mál með vexti að húsið 'mitt' -grænahúsið- skoraði á hin húsin (gula og rauða) í gær. Við mættum til þeirra eftir vinnu og kepptum í ýmsum þrautum. Yfir þessu hvíldi mikil leynd og við í græna vorum mjög dugleg að undirbúa okkur... hinir kalla það að svindla en við höldum fast í það að þetta hafi bara verið mjög góður undirbúningur. Til allrar hamingju voru allir í góðu stuði og skemmtu sér hið besta þrátt fyrir rigningu og kulda. Keppt var í actionary, ógeðismatsáti og ógeðisdrykkjadrykkju, bjórsmökkun og bjórþambi. Liðin áttu líka að búa til boli og fána, kunna nöfnin á starfsmönnum hinna húsanna og semja fallegt ljóð um liðsmennina. Ég verð að segja að græna húsið stóð sig langbest í þessum þrautum og ég var mjög stolt af mínu fólki! Til stóð að keppt yrði í sultukasti, þar sem það lið sem hitti meiri sultu á yfirmann sinn myndi vinna en sú keppni var felld niður. Ég var hálfsvekkt, ég er alveg til í leyfa fólki að grýta í mig sultu... Ef það eflir starfsandann það er að segja ;) Fólk var orðið frekar skrautlegt ansi snemma kvölds, nema ég sem bragðaði ekki dropa! Dugleg ha? Var að gaula frá 10 til 18 í dag og annað eins framundan á morgun svo þá er ekki hægt að vera í einhverju brennivínssulli, ó nei! Þá er það bara snemma í rúmið í sokkum og með trefil hmmm

þriðjudagur, apríl 05, 2005

Teknótæfan
Ég er ekkert smá tæknileg núna! Sit við lapptoppinn að reyna að vera að vinna og er búin að stinga mp3 dótinu úr spilaranum (öðrum af tveimur sem ég á! ha!) í tölvuna og er að hlusta á stuðmúsík úr Evutölvu. Og ég fann alveg ein út úr því hvernig þetta virkar! Ekkert smá dugleg :)

laugardagur, apríl 02, 2005

Gömul og þunn en hamingjusöm

...eru þau orð sem best lýsa ástandinu á mér í dag. Ástarþakkir til ykkar sem sendu mér afmæliskveðjur. Það er það besta við að eiga afmæli, minnir mann á hversu marga og góða vini maður á. Þið eruð frábær :*
Kvartaldardagurinn var góður, mjög góður. Góður félagsskapur, góður matur, gott veður, góðar gjafir og bara eintóm hamingja og fuglasöngur! Fékk afmælisbréf, afmæliskort, afmælissöngva (nokkra!), afmælistölvupóst, afmælishringingar, afmælissms, afmælisgjafir, afmælismat, afmælisköku, afmælisknús og afmæliskossa... er hægt að biðja um það betra? Átti fínindis vinnudag, keypti mér gullskó og fór á Austur-Indíafjelagið. Við skulum ekkert byrja að tala um naan-brauðið... slef! Endaði svo daginn með Nýdönsk á Nasa, þvílíkir snillingar! Var reyndar umvafin ókunnu fólki en það passaði vel upp á mig og sá til þess að mig skorti hvorki félagsskap né votar veigar alla nóttina.
Dagurinn í dag var ekki alveg eins góður. Nett þynnka í gangi, en ekkert svaðaleg. Bara nóg til að minna mig á afhverju ég djamma sjaldan en geri það þá almennilega. Segi svo ekki meir :)