Ég var að vinna í Breiðholtinu um helgina og maður minn! hvað maður þarf að vinna upp sambýlisþolið sitt. Það var reyndar mjög gaman báða dagana, strákarnir í stuði og ég að vinna með uppáhaldssamstarfskonum mínum svo þetta var bara eins og standandi saumaklúbbur. Ok, kannski ekki alveg... En ég var eins og flón, sagði öll orðin sem á ekki að segja, skildi ekki tákn og bendingar og setti hluti á vitlausa staði hægri vinstri. En skemmtilegt er þetta, sérstaklega þegar maður sér framfarir og vellíðan í húsinu. Nú er bara að vona að það vanti helling á vaktir svo ég geti komið mér aftur í starfshæft stand og jafnvel fengið eins og tvö þúsund krónur í laun næstu mánaðarmót. Það væri nú lúxus!
Ég er varla að trúa því að það sé sól úti, ég átti engan veginn von á því þar sem mér var lofað rigningu alla vikuna. En ég lifi vonbrigðin af og hugsa mér gott til glóðarinnar fáklædd á fáknum. Verst að ég er ekkert á leiðinni í sund þar sem Dr.Ólöf hafði rétt fyrir sér varðandi greiningu á útbrotinu mínu. Það hefur nú fjölgað sér hressilega og þekur allstóran blett milli brjósts og nafla. Splendid. En til að standa undir Pollý-Önnu nafnbótinni hef ég fundið margar ástæður fyrir því að það er ekki alslæmt. Það þýðir til dæmis að:
- Ólöf er snilldarsjúkdómsgreinir og mun geta greint allt frá bleiuútbrotum til sárasóttar á næstu mánuðum sem starfandi heilsugæslulæknir, án þess að hika.
- Ég mun draga stórlega úr líkum mínum á sortuæxlum ef ég forðast sundferðir á bikiní.
- Ef ég drekk í mig kjark og fer í sundferð á bikiní mun enginn taka eftir bumbunni minni eða sígandi afturenda, því stökkbreytt húðin mun draga að sér alla athygli.
- Ég er ein af 0,14% fólks á þessum hluta jarðar sem fær þessa veiru. 14 af hverjum 10.000 manns. Með þessar líkur í farteskinu verður lítið mál að vinna Lottó á laugardaginn.
(Dr.Ólöf vildi líka finna því til framdráttar að þetta er ekki smitandi og ég þarf ekki að taka lyf. En þar sem ég hef ekki hugsað mér að nudda maganum upp við annað fólk á næstunni (var ég ekki búin að segja ykkur að ég er að fara að flytja í Hafnarfjörðinn?) og kýs frekar fljótvirkandi lyf en náttúrulega meðgöngutímann 4vikur-6mánuðir (!!) fá þær afsakanir ekki að vera með á listanum nema inn í sviga).
Eins og af ofantöldu má greina er ég lukkunnar pamfíll að hafa fengið þessa veirusýkingu og ég bið ykkur því vel að lifa á meðan ég valhoppa út í garð!
xx